---

ԱՐՄԱՆ ՆԱՎԱՍԱՐԴՅԱՆ Արտակարգ և լիազոր դեսպան, ԵՐԵՎԱՆ  Պրոֆեսիոնալ դիվանագետներն ու հետախույզներն ունեն մի կարևոր նշանաբան` իմանալ դիմացինի մասին ավելին, քան նա գիտե քո մասին, այսինքն` ունենալ նրա մասին հավաստի ինֆորմացիա: Այդ նպատակով դեսպանություններն ստեղծում են հատուկ քարտարան, որտեղ զետեղված են դեսպանընկալ երկրի պետական-քաղաքական, հասարակական, կուսակցական, դիվանագիտական, մշակութային գործիչների, խոշոր արդյունաբերողների և բիզնեսմենների մասին տեղեկանքներ` ‹‹քաղաքական-հոգեբանական դիմանկար››: Դրանք մշտապես դեսպանի և մյուս դիվանագետների ձեռքի տակ են հանդիպումների և զրույցների ժամանակ: Դրանցից օգտվում են արտգործնախարարությունները, պետական և կառավարական կառույցները միջպետական բանակցությունների և համաժողովների ընթացքում: ‹‹Դիմանակարն›› արտացոլում է բնութագրվողի քաղաքական գործունեության փուլերը` դինամիկայի մեջ: Այնտեղ դուք կարող եք ծանոթանալ տվյալ գործչի դիրքորոշմանը քո երկրի և միջազգային խնդիրների նկատմամբ նրա ելույթներից, հարցազրույցներից, պաշտոնական ինֆորմացիայից և գաղտնի աղբյուրներից: Նշեմ, որ այստեղ հարկ է ցուցաբերել զգուշություն և ընտրովի մոտեցում` չսխալվելու ու անճշտություններ չանելու համար, որը հաճախ տեղի է ունենում աղբյուրների ակամա կամ դիտավորյալ ապատեղեկացման դեպքում: Տվյալ անձնավորության հետ հաղորդակցության և հաջող աշխատանքի արդյունքը կախված է նաև այն բանից, թե դեսպանությունը որքան օբյեկտիվ է տեղեկացված նրա նախասիրությունների, ընտանեկան կարգավիճակի, կապերի և ապագա պլանների մասին: ‹‹Դիմանկարն›› ամբողջովին և սպառիչ չի դիտվի, եթե սահմանափակվի բնութագրվողի զուտ քաղաքական հայացքների շարադրմամբ: Այդ իսկ պատճառով դիմանկարում նույնպես արտացոլվում են բնավորության գծերը, բարոյակամային հատկանիշները, հոգեկերտվածքը: Կարևոր է իմանալ` ինչպիսին է նրա խառնվածքը. սանգվինիկ (տաքարյուն, ակտիվ, եռանդուն), ֆլեգմատիկ (դանդաղաշարժ, հանդարտ), խոլերիկ (դյուրագրգիռ, խռովահույզ): Այս առումով, իմ կարծիքով, լավագույնն այն զրուցակցին է, որն իր մեջ զուգակցում է սանգվինիկ և ֆլեգմատիկ խառնվածքները: Հաղորդակցության վրա նկատելիորեն ազդում է նաև զրուցակցի էքստրավերտ կամ ինտրովերտ լինելը: Նշված փաստաթուղթը ‹‹ժառանգական›› է. այն առաջին անգամ կազմվելուց հետո մշտապես լրացվում և փոխանցվում է դիվանագիտական հաջորդ հերթափոխին, և այդպես շարունակ: Շարունակելի...

ՄԱՐԴԿԱՅԻՆ ՀԱՂՈՐԴԱԿՑՈՒԹՅԱՆ ԳԱՂՏՆԻՔՆԵՐԸ

4454 reads | 15.07.2014 | - Գնահատել - Գերազանց է Լավ է Վատ չէ Վատ է Ահավոր է