ՓԱԽՍՏԱԿԱՆՆԵՐԸ, ԵՒՐՈԳՕՏԻՆ ԵՒ ԹՈՒՐՔԱԿԱՆ ՍԱԴՐԱՆՔԸ...
 ԴԵՐԵՆԻԿ ՄԵԼԻՔԵԱՆԻրանի «Ալիք» օրաթերթի գլխավոր խմբագիր, ԻՐԱՆ  Միջին ու Մերձաւոր Արեւելքի եւ Աֆրիկայի յայտնի արհաւիրքներից ու պատերազմական իրավիճակներից խոյս տւող մարդկային հոծ զանգւածների՝ փախստականների անվերջանալի շարասիւներ են կուտակւել Եւրոգօտու անմիջական մատոյցներում:Պատճառ-հետեւանքային իրադարձութիւնների պատասխանատւութիւնը խոշոր տոկոսով վերագրելի է նոյնինքն Եւրոպայի առաւել եւս արեւմտա-ԱՄՆ-ամէտ այն ճամբարին, որի, այսպէս ասածª տնտեսական գլոբալ քաղաքականութեան արդիւնքում նոյն Եւրոմիութեան տնտեսական համակարգը մեղմ ասած՝ ճգնաժամ է ապրում, ընդհուպ մինչեւ միութեան տրոհում...: Իսկ նոյն ճամբարի աշխարհաքաղաքական նկրտումների ուղղակի արդիւնքն է աշխարհատարած լրատւական թէ համացանցային լրահոսում չդադարող փախստականների ոդիսականները... Այս ամենի հաշւին արդարանալու համար, խոցւած Եւրոպան նոր մրցավազք է ձեռնարկել փախստականներին տուն-տեղ-աջակցութիւն ցուցաբերելով, մարդասիրական ու ժողովրդավարական իր յատկանիշերը գերագնահատելու մոլուցքից մղւած...:  Ահաւասիկ.-Աշխարհի այսրոպէական թիւ 1 իրադարձութեան (փախստականներ) բուն պատճառը հանդիսանալով՝ Եւրոպան ճարահատ իր վրայ է կրում նաեւ հետեւանքը... այլապէս ո՞ւր էին նոյն արեւմտա-եւրոպական ժողովրդավարական ու մարդասիրական հակումները, երբ հէնց իրենց տնտեսա-քաղաքական ու առաւել եւս «քաղաքակրթական» հանթինգթոնեան ստրատեգները «Նոր Միջին Արեւելք»-ներ ու «Արաբական գարուն»-ներ էին մոգոնում-ուրւագծում...: Այլապէս, նոյն Արեւմուտքի ու Եւրոպայի երես առած մանկլաւիկ Թուրքիան լկտիօրէն չէր սադրի ու շահարկի «փախստականների գործօնը» հէնց Եւրոպայի դէմ ու չէր յանդգնի համաշխարհային սպառնալիք ԴԱԷՇ-ին ճզմելու պատրւակ-իմիտացիայով քրդասպան իր հնամենի ծրագիրը ի գործ դնել: Եւրոպան, սակայն, իր Եւրոմիութեամբ ու Եւրոխորհրդով տնտեսա-քաղաքական հեռահար ծրագրերը վերանայելու անխուսափելի հարկադրանքի դէմ-յանդիման է կանգնած. այլապէս նոյն մշակւած ծրագրերը բումերանգի օրինաչափութեամբ ի վնաս իրեն են աշխատելու՝ քայքայելով կանաչապատ աշխարհամասի եւ միութիւնը, եւ միասնականութիւնը...: | |
| ԴԵՐԵՆԻԿ ՄԵԼԻՔԵԱՆ | |
| 2486 reads | 17.09.2015
| |
